МСК жаңы ЭСФ формасынын эрежелерин түшүндүрдү
Мамлекеттик салык кызматы 23-февралда Бишкек шаарында сатуучулар (селлерлер) жана маркетплейстердин өкүлдөрү үчүн электрондук эсеп-фактуранын (ЭСФ) жаңы формасын колдонуу боюнча окутуу семинарын өткөрдү.
Жаңы эрежелер бизнес ишин жеңилдетүүгө жана товарларды ЕАЭБ өлкөлөрүнө тоскоолдуксуз алып чыгууга багытталган. Иш-чарага тигүү ишканаларынын жетекчилери, тармактык ассоциациялардын өкүлдөрү жана Салык кызматынын төрага орун басарлары катышты.
Жаңы эсеп-фактура формасы товарларды ташуу учурунда коштоочу документ катары колдонулат. Ал продукция КР аймагынан соода аянтчаларынын кампаларына менчик укугу дароо өтпөстөн чыгарылган учурда талап кылынат. Бул механизмдин негизги артыкчылыгы — мындай ЭСФ товарды сатуу катары эсептелбейт. Демек, логистика баскычында салыктык милдеттенме жаралбайт.
Ишкерлер акыркы отчетту акча каражаты эсептик эсепке түшкөндөн кийин түзүүгө тийиш. Мында селлер отчеттук айдан кийинки айдын 10 жумуш күнүнөн кечиктирбестен бирдиктүү электрондук эсеп-фактураны жол-жоболоштурууга милдеттүү.
МСК бул нормаларды административдик тоскоолдуктарды азайтуу максатында киргизгенин белгилеп, бул чаралар электрондук коммерция тармагында товар жүгүртүүнүн ачыктыгын жана ылдамдыгын жогорулатууга өбөлгө түзөрүн билдирди.
