Лебединовка ГЭСин Кытай корпорациясы реконструкциялайт
"Чакан ГЭС" ААКсы Лебединовка ГЭСин реконструкциялоо боюнча башкы подрядчы — China National Heavy Machinery Corporation менен келишим түзгөнүн коомдун басма сөз кызматы билдирди.
Маалыматка ылайык, адистер долбоордук-сметалык документацияны даярдоого киришти.
Долбоор станциянын жабдууларын жаңылоону, өндүрүмдүүлүгүн жогорулатууну жана пайдалануу мөөнөтүн узартууну карайт. Иш-чаралар ишке ашырылгандан кийин төмөнкү көрсөткүчтөргө жетишүү пландалып жатат:
- орнотулган кубаттуулук 7,6 мегаватттан 10 мегаваттка чейин көбөйөт;
- жылдык электр энергиясын өндүрүү 37,2 миллиондон 53,5 миллион киловатт-саатка чейин өсөт (өсүш болжол менен 44%ды түзөт);
- гидроэлектр станциясынын жалпы ишенимдүүлүгү жогорулайт.
Лебединовка ГЭСи Чүй облусундагы эң эски станциялардын бири болуп саналат. Анын курулушу 1942-жылдын май айында башталган. Негизги иштер катаал кыш мезгилине туш келген. 7 миңден ашуун аялдар жана балдар тоңгон жерди кол менен казып, пайдубалды сактап калуу үчүн күн сайын 200 куб метрге чейин жер алдындагы сууну сордуруп турушкан.
Курулуш бир жыл эки жумага созулган. 1943-жылы Фрунзе шаары (азыркы Бишкек) өтө зарыл болгон электр энергиясына ээ болгон. Бул эвакуацияланган заводдорду ишке киргизүүгө мүмкүндүк берип, алар фронтту камсыздап турган.
