Улуттук банк: Кыргызстандагы эсептик чен коңшу өлкөлөрдүкүнө салыштырмалуу төмөн

Кыргызстанда эсептик чен жарыяланган жогорулатууга карабастан, аймактагы өлкөлөрдүн ичинен эң төмөн бойдон калганын маалымат жыйында Азат Козубеков билдирди.

Анын айтымында, Россия Федерациясында эсептик чен 15,5%дан жогору деңгээлде сакталууда.

"Эки жума мурда Россиянын Борбордук банкы эсептик ченди төмөндөтүү чечимин кабыл алган. Бирок ошого карабастан, ал 15,5%дан кыйла жогору бойдон калууда", — деди ал.

Казакстанда базалык чен 18%ды, Өзбекстанда 14%ды түзөт.

"Ошентип, Кыргызстанда бүгүн жарыяланган эсептик чендин жогорулатылышына карабастан, ал биздин аймактагы өлкөлөрдүн ичинен эң төмөнү болуп саналат", — деди Козубеков.

Буга улай ал Россияда инфляициянын деңгээли болжол менен 5,9%ды, Казакстанда 12,2%ды, Өзбекстанда 7,2%ды түзөрүн маалымдады.

"Айрым өлкөлөрдүн ички факторлорун эске албаганда, Борбор Азия өлкөлөрүндөгү инфляциялык фон жалпысынан окшош — 8 пайыздан 12 пайызга чейин", — деди Улуттук банктын төрагасынын орун басары.

"Инфляция — глобалдык көйгөй. Ага биздин аймактагы бардык өлкөлөр туш болууда. Ар бир борбордук банк ички экономикалык шарттарга жараша эсептик чен жана акча-кредит саясаты боюнча чечим кабыл алат", — деп белгиледи ал.

Козубековдун пикиринде, эсептик чендин азыркы 12%га жакын деңгээли өлкө экономикасы үчүн оптималдуу.