Кыргызстанда стартаптарга 1 млн сомго чейин жеңилдетилген насыялар берилет
Кыргызстанда мамлекеттик программа алкагында жаңы баштапкы ишкерлерге колдоо көрсөтүлөрүн "Биринчи радио" эфиринде Экономика жана коммерция министрлигинин Бизнес-чөйрөнү өнүктүрүү саясаты башкармалыгынын ишкерлерди өнүктүрүү бөлүмүнүн башчысы Нурбек Уметалиев билдирди.
Анын айтымында, 2026-жылдын башында өкмөттүн чечими менен 2030-жылга чейин иштей турган долбоор бекитилген.
"Стартаптарды ар кандай багыттар боюнча колдоого алышат — программаны жүзөгө ашыруу учурунда болжол менен 20 ишкердик багыт каралган. Бир долбоорго 1 млн сомго чейин 18 айлык насыя берилет, анын ичинде 6 айлык жеңилдетилген мөөнөт каралган. Жеңил мөөнөттөн кийин ишкерлер пайыздык төлөмдөрдү баштайт", — деди Нурбек Уметалиев.
Ал кошумчалагандай, төрт коммерциялык банк буга чейин эле кредиттерди берип жатат.
Нурбек Уметалиев 2025-жылы дагы бир стартаптарды колдоо долбоору бекитилгенин эскертти, аны Ишкерлерди өнүктүрүү фонду ишке ашырат. Ал жерде кредиттер 8% менен берилет жана жеңилдетилген режимдер каралган эмес.
