Күрөөнүн баасын атайылап төмөндөтүү алдамчылык – Г.Кожогулова
Депутат Гуля Кожокулова парламент жыйынында насыя боюнча күрөөнүн суммасын атайылап төмөн баалоону банктардын тузагы деп атады. Анын айтымында, күрөө мүлкү рыноктогу чыныгы баасына ылайык бааланбайт.
"Жарандар катуу шарттарга туш болуп, насыяларын белгиленген мөөнөттө төлөй албай калышат. Канча тагдыр талкаланды, канча адам өз жанын кыйды! Коммерциялык банктардын жоопкерчилигин да караш керек. Анткени муну алдамчылык катары да кароого болот. Эгер күрөөгө коюлган мүлктүн баасын атайылап төмөн баалоо фактылары болсо, анда мындай банктардын лицензиясын кайтарып алуу маселесин көтөрүү керек", — деди Гуля Кожокулова.
Улуттук банк өкүлү Санжар Абдыгазиев коммерциялык банктар тарабынан күрөөнүн суммасын негизсиз жогорулатуу же аны туура эмес аныктоо мыйзам бузуу болуп саналарын моюнга алды.
Ал түшүндүргөндөй, Улуттук банк күрөөнүн так суммасын белгилебейт, болгону аны аныктоонун жалпы талаптарын жана тартибин бекитет. Анын айтымында, жөнгө салуучу орган банктар күрөөнү баалоодо кайсы критерийлерди эске алышы керектигин гана аныктайт.
