Эки айда кызмат көрсөтүү тармагы 107,1% өсүштү камсыздады
Үстүбүздөгү жылдын январь-февраль айларынын жыйынтыгы боюнча Кыргызстанда социалдык-экономикалык өнүгүү туруктуу өсүштү көрсөттү. Бул тууралуу Экономика жана коммерция министрлиги Улуттук статистика комитетинин алдын ала маалыматына таюнуу менен билдирди.
Маалыматка ылайык, кызмат көрсөтүү тармагы ИДПнын түзүмүндө дээрлик 50% үлүштү ээлеп, экономиканын негизги кыймылдаткычы бойдон калууда. Бул тармак экономикалык өсүшкө 4,82%дык пункт кошуп, өсүү темпи 107,1%ды түздү.
Ошол эле учурда жыл башында соода активдүүлүгүнүн сезондук төмөндөшүнө байланыштуу кызмат көрсөтүү секторунда өсүш бир аз жайлады. Айрыкча дүң жана чекене соодадагы динамиканын басаңдашы байкалды.
Бирок 2025-жылдын ушул мезгилине салыштырмалуу:
- дүң жана чекене соода жүгүртүүсү 13,2%га өстү;
- чекене соода 14,3%га;
- дүң соода 9,1%га көбөйдү.
Транспорт жана жүктөрдү сактоо кызматтары 21,9 млрд сомду түзүп, 3,7 %га өстү. Бул негизинен почта жана курьердик кызматтардын 18,4%га көбөйүшү менен байланыштуу.
Мейманкана жана ресторан кызматтары 13,2%га өсүп, 7,7 млрд сомго жетти. Ошондой эле маалымат жана байланыш кызматтарынын көлөмү 8,2%га көбөйдү.
Жалпысынан алганда, кызмат көрсөтүү сектору экономиканын негизги өсүү булагы бойдон калууда.
