"Эл Аман" мамлекеттик дарыканалары 1 млрд 671 млн сомдук дары сатты
“Эл Аман” мамлекеттик дарыканалары ачылгандан бери 1 млрд 671 млн 459 миң сомго дары сатканын “Эл Аман” мамлекеттик дарыканаларынын жетекчиси Рысбек Акынбеков “Биринчи радионун” түз эфиринде билдирди.
Маалымдалгандай, анын ичинен 185 млн 947 миң сом мамлекетке салык төлөгөн.
“Кыргызстан боюнча бүгүнкү күндө 72 “Эл Аман” мамлекеттик дарыканалары бар. Анын ичинен Бишкек шаарында 16 дарыкана, Чүй облусунда 9, Ысык-Көл облусунда 5, Талас облусунда 6, Нарын облусунда 3, Баткен облусунда 5, Жалал-Абад облусунда 15, Ош облусунда 13 жана Ош шаарынын өзүндө 3 дарыкана бар. Быйыл дагы жаңы дарыканаларды ачуу планыбызда бар.
Учурда 45 фармацевтикалык компания дистрибьютор менен иштейбиз. Биздин дарыканаларда жеке менчик дарыканаларга салыштырганда 10-15%га дарылар арзан”,- деди Акынбеков.
Эскерте кетсек, "Эл Аман" мамлекеттик дарыканалары калкты арзан баадагы дары-дармек камсыздоо максатында 2 жыл мурда түзүлүп, иштеп баштаган.
