Москва районунда 579 сомдук мыйзамсыз күйүүчү май аныкталды
Мамлекеттик салык кызматы рейддик салыктык көзөмөлдүн жүрүшүндө Чүй облусунун Москва районунда бензинди мыйзамсыз сатуу фактысын аныктаганы мекеменин басма сөз кызматы билдирди.
Садовое айылындагы май куюучу жайлардын биринде күйүүчү май милдеттүү молекулярдык маркерлерсиз сатылып жатканы аныкталган.
"Мыйзам бузуу атайын анализатордун жардамы менен аныкталды, ал күйүүчү майдын курамында маркер жок экенин көрсөткөн. Бул факт Учкун ААК тарабынан жүргүзүлгөн лабораториялык изилдөөлөрдүн жыйынтыгы менен да тастыкталды", — деп айтылат маалыматта.
Салык кызматынын маалыматына ылайык, текшерүүнүн жыйынтыгында жалпы суммасы 579 миң сомдон ашкан 8,5 миң литр күйүүчү май алынган.
Мамлекеттик салык кызматкерлери тиешелүү актыларды түзүштү. Чогултулган материалдар укуктук баа берүү жана мыйзамга ылайык чара көрүү үчүн укук коргоо органдарына жөнөтүлдү.
2024-жылдын 1-октябрынан тартып Кыргызстан аймагында бензин жана дизелдик күйүүчү майды милдеттүү маркалоо киргизилген. Бул талап импорттолгон жана өлкө ичинде өндүрүлгөн күйүүчү майга бирдей тиешелүү. Молекулярдык маркерлерсиз күйүүчү майды алып кирүү, ташуу жана сатууга тыюу салынган.
