Кыргызстандан Кытайга 25 тонна жүгөрү экспорттолду
Кыргызстандан Кытай Эл Республикасына жүгөрү экспорттоо башталды. Бул тууралуу Айыл чарба министрлигине караштуу Өсүмдүктөрдү химиялаштыруу, коргоо жана карантин департаменти маалымдады.
2026-жылдын 16-мартында жүгөрүнүн алгачкы партиясы экспортко жөнөтүлдү. Анын көлөмү 25 тоннаны түздү. Экспорттоочу — "Зиябидин Ата" дыйкан чарбасы.
Жүгөрү экспортунун башталышы 2022-жылы Кыргызстан менен Кытайдын ортосунда кол коюлган фитосанитардык талаптар боюнча протоколдун алкагында ишке ашты. Документ айыл чарба продукциясын экспорттоого укуктук негиз түзөт жана эл аралык талаптардын сакталышын камсыздайт.
Учурда Кытайга жүгөрү экспорттоо укугуна эки ата мекендик ишкана ээ.
Департамент мындан ары да өндүрүүчүлөрдү колдоону жана кыргыз айыл чарба продукциясынын экспорттук мүмкүнчүлүктөрүн кеңейтүүнү улантарын билдирди.
