Суу сактагычтардагы балыктарды көбөйтүү кандай жүрүп жатат?
Жогорку Кеңештин 2026-жылдын 18-мартындагы жыйынында депутат Болотбек Борбиев Токтогул суу сактагычында кытай синтетикалык балык уулоочу торлордун салынышы, ошондой эле суу сактагычтагы балыктарды көбөйтүү маселеси көтөргөн. Бул боюнча Балык өнөр жайы комплекси департаменти жооп берди.
Министрлер Кабинетинин 2025-жылдын 6-октябрындагы №636 “Айрым суу сактагычтарда киреше табуу үчүн, массалык түрдө балык кармоого мораторий киргизүү жөнүндө” токтому чыккан.
Аталган токтомдун 1-пунктуна ылайык, Балык өнөр жайы комплекси департаменти тарабынан 2026-жылдын октябрь айында төмөнкү суу сактагычтарды орточо салмагы 25 грамм карп-сазан балыгынын чабактары менен балыктандыруу иш-чаралары пландалып жатат:
Токтогул суу сактагычына — 150 000 даана;
Киров суу сактагычына — 100 000 даана;
Базар-Коргон суу сактагычына — 10 000 даана;
Шамалды-Сай суу сактагычына — 5 000 даана;
Таш-Көмүр суу сактагычына — 5 000 даана
Мындан тышкары, токтомдун 3 жана 4-пункттарына ылайык, Жаратылыш ресурстары, экология жана техникалык көзөмөл министрлиги жана Ички иштер министрлиги тарабынан Токтогул, Базар-Коргон, Күрп-Сай, Шамалды-Сай, Таш-Көмүр, Үч-Коргон жана Киров суу сактагычтарында мыйзамсыз балык уулоону жана браконьерликти алдын алуу максатында рейддик иш-чаралар жүргүзүлүп жатканы айтылат.
