Нарында 3306 гектар сугат жери өздөштүрүлөт – С.Жапаров
Соңку беш жылда Нарында ирригация тармагында 3 млрд сомго жакын иштер аткарылганын президент Садыр Жапаров бүгүн Нарын шаарында өтүп жаткан Нооруз майрамына арналган салтанаттуу иш-чарада билдирди.
Өлкө башчысы белгилегендей, Нарын тоолуу өрөөн, кокту сайын суу түшкөн аймак болгону менен, облуста сугат суу менен камсыздоодо дагы көйгөйлөр болуп келген. Мындан улам сугат сууга байланышкан бир катар иштер жасалды.
"Бул жаатта соңку беш жылда ирригация тармагында 3 млрд сомго жакын иштер аткарылды. Анын алкагында каналдар оңдоп-түзөлүп, бетондолду. Ошондой эле гидротехникалык станциялар, гидропосттор, насостук станциялар ремонттолду. Жумгалдагы Түгөл-Сай суу сактагычы менен Кочкордогу Шамшы БДРин быйыл ишке берели деп турабыз. Мунун натыйжасында 4 294 гектар жерге сугат суусун берүү жакшырат, ал эми 3306 гектар жаңы сугат жери өздөштүрүлөт", - деди президент.
