Соода-өнөр жай палатасы менен «Дордой Камсыздоо» кызматташуу боюнча меморандумга кол коюшту
КРнын Соода-өнөр жай палатасы менен «Дордой Камсыздоо» ЖАК ортосунда өз ара түшүнүшүү жана кызматташуу тууралуу меморандумга кол коюлду. Документ бизнес коомчулугу менен камсыздандыруу секторунун ортосундагы кызматташууну өнүктүрүүгө багытталган.
Соода-өнөр жай палатасынан маалымдагандай, меморандумга кол коюуда тараптар азыркы шартта ишкерлерге бизнести өнүктүрүү үчүн гана эмес, мүмкүн болуучу тобокелдиктерден коргонуу үчүн да ишенимдүү механизмдер зарыл экенин белгилешти. Кызматташтыктын алкагында каржылык жана камсыздандыруу сабаттуулугун жогорулатуу, камсыздандыруу коргоо механизмдерин өнүктүрүү жана ишкерлердин тышкы экономикалык ишмердүүлүгүн колдоо боюнча биргелешкен иштер жүргүзүлүшү күтүлөт.
Ошондой эле өнөктөштүктүн алкагында тобокелдиктерди башкаруу маданиятын калыптандыруу, бизнес үчүн заманбап камсыздандыруу чечимдерине жеткиликтүүлүктү кеңейтүү жана камсыздандыруу инструменттерине болгон ишенимди арттыруу маселелерине өзгөчө көңүл бурулмакчы.
Тараптар кол коюлган меморандум узак мөөнөттүү жана натыйжалуу кызматташууга негиз болуп, өлкөдөгү ишкердик чөйрөнүн өнүгүшүнө жана камсыздандыруу маданиятынын жогорулашына өбөлгө түзөрүнө ишенимин билдиришти.
