Сабиз арзандап, жумуртка кымбаттады – базардагы акыркы өзгөрүүлөр

Суу ресурстары, айыл чарба жана кайра иштетүү өнөр жайы министрлиги 2026-жылдын 18-мартына карата Кыргызстанда, ошондой эле Россия жана Казакстанда негизги азык-түлүк товарларына баа мониторингин жүргүздү.

Мониторингдин жыйынтыгында Кыргызстанда жумуртка (1,1%), сүт (0,7%), уй эти (0,2%), импорттолгон буудай уну жана нан (0,1%) баалары жогорулаганы аныкталды. Ошол эле учурда сабиз (1%), картошка (0,8%), баш пияз (0,6%), өсүмдүк майы (0,6%), кумшекер (0,3%), кой эти жана жергиликтүү буудай уну (0,2%) арзандаганы байкалды.

Казакстанда каймак май (33,8%), картошка (13,1%), буудай уну (0,7%), кой эти (2,9%), өсүмдүк майы (2,7%), сүт (2,2%) жана макарон азыктарынын айрым түрлөрү кымбаттаган. Ал эми күрүч (14,3%), нан (13,5%), сабиз (9,6%), уй эти (4,7%) жана башка айрым азыктар арзандаган.

Россияда буудай уну (4,7%), жумуртка (2,7%), сабиз (2%) жана картошка (0,2%) баалары жогорулаган. Ошол эле учурда каймак май (4,4%), өсүмдүк майы (3,7%), сүт (3,6%), эт азыктары жана күрүч, макарон, кумшекер, баш пияз сыяктуу товарлардын баасы төмөндөгөн.

Министрлик азык-түлүк бааларына туруктуу мониторинг жүргүзүүнү улантууда.