"Туз" БДРи оңдолсо 2400 гектар жер сугат суусу менен камсыз болот
Суу ресурстары, айыл чарба жана кайра иштетүү өнөр жайы министрлиги массалык маалымат каражаттарынын өкүлдөрү үчүн Чүй облусунун Ысык-Ата районуна жазгы талаа иштеринин жүрүшү, сугат суусу боюнча пресс-тур өткөрдү.
Ысык-Ата райондук агрардык өнүктүрүү башкармалыгынын башчысы Бек Жекшембаевдин айтымында, райондо 60 миңден ашуун айдоо жери бар, анын ичинен 12 миң гектары кайрак жер болсо, калганы сугат жерлери болуп эсептелет.
“Бүгүнкү күндө райондо жазгы талаа иштери толук кандуу жүрүп жатат. 10 миңден ашуун гектар жерге кылкандуу дан эгиндери себилди. Жүгөрү, кант кызылчасы, жашылча жемиштер себилип жатат”, -деди Бек Жекшембаев.
Ал учурда үрөндүн, жер семирткичтин күйүүчү майлоочу майдын да жетиштүү экенин кошумчалады. Ысык-Ата райондук суу чарба башкармалыгынын башкы инженери Уланбек Үрүстөмов БДР, БСРлердин ишмердүүлүгү менен тааныштырды.
Журналисттерге 2025-жылы капиталдык оңдоодон өтүп, ишке берилген “Ивановка” суу сактагычын көрсөттү. Аталган жайдын оңдоп түзөө иштери 2024-жылы башталып, 2025-жылы ишке берилген. Ага 1,2 млн. куб суу батат. Быйылкы сугат мезгилине карата аталган БДРге суу топтоо иштери жүрүп жатат. Андан соң, журналисттер “Туз” БДРинин курулушунун жүрүшү менен таанышты. Аталган объект жыл соңунда ишке берилет. Курулуштун куратору Мыйзам Ажиевдин айтымында, бул БДР ишке берилсе, 2400 гектар жерди сугат суусу менен камсыздоого жете турган 1,8 млн кубдан ашуун суу чогултуу мүмкүнчүлүгү түзүлөрү айтылууда.
