Кыргызстандыктар үчүн Египетке кирүү эрежелери өзгөрдү
Египет кыргыз жарандары үчүн жаңы кирүү талаптарын жарыялады. Ал 2026-жылдын 1-ноябрынан тарта күчүнө кирет. Кыргызстандын Тышкы иштер министрлигинин маалыматы боюнча, өзгөртүүлөр Борбордук Азия өлкөлөрү, анын ичинде Кыргызстан жарандарына тиешелүү.
Маалыматка ылайык, алдыда саякатты пландап жаткан кыргызстандыктар Астанадагы Египет элчилигинен же башка ыйгарым укуктуу дипломатиялык миссиядан алдын ала кирүү визасын алышы керек. Мындан тышкары, Египеттин компетенттүү коопсуздук органдарынын алдын ала макулдугу талап кылынат.
"Туристтик топтор же компаниялар аркылуу келген жарандар 16 жаштан 40 жашка чейин болуусу керек. Бул категориядагы туристтер жакын тууганы - атасы, энеси, жубайы же баласы менен бирге саякатташы керек. Ошондой эле саякатчылар жанына кеминде 3000 доллар накталай акча алып жүрүшү керек. Ар бир үй-бүлө үчүн кеминде 5000 доллар. Эгерде үй-бүлө топ менен саякаттап жүрсө, ар бир адам үчүн минималдуу накталай акча суммасы 5000 долларды түзөт.
Туристтик агенттиктер үчүн да кошумча талаптар белгиленген. Алар саякатчылардын уюлдук телефон номерлерин каттап, туристтик топтун Египетте болушу үчүн алдын ала маршрут даярдашы керек. Эгерде турист белгиленген күнү Египеттен чыгып кетпесе, компания дароо тийиштүү органдарга кабарлашы керек. Саякатчыларга туристтик визасында көрсөтүлгөн кирүү максатын өзгөртүүгө да тыюу салынат", - деп жазылат маалыматта.
Кыргызстандын Тышкы иштер министрлиги жарандарды Египетке кирүү шарттарын алдын ала текшергенден кийин гана жолдомо жана башка төлөмдөрдү жүргүзүү керектигин эскертүүдө.
Ошондой эле виза талаптарына, коштоп жүрүүчү туугандардын зарылдыгына, каражаттын болушуна жана туроператордун документтерди сактоо жол-жоболоруна өзгөчө көңүл буруу сунушталат.
Тышкы иштер министрлиги саякат алдында түшүндүрмө алуу үчүн компетенттүү органдарга кайрылуу керектигин эскертет.
Астанадагы Египет элчилиги: +7 (7172) 24-18-30, +7 (7172) 28-60-67;
Элчиликтин электрондук почтасы: embassy.astana@mfa.gov.eg;
Кыргызстандын Тышкы иштер министрлигинин Консулдук департаменти: 0999 312 002.
