"Кыргызалтынга" Таластагы Андаш кенин иштетүүгө укук берилди
Министрлер Кабинети 2026-жылдын 26-мартындагы №198-т тескемеси менен "Кыргызалтын" ААКына Талас облусунун Талас районунда жайгашкан Андаш кенинин №1 рудалык алтын жана жез казып алуу үчүн жер казынасын пайдалануу укугун берди.
Документке ылайык, бөлүнгөн участоктун аянты 400 гектарды түзөт.
Кенди иштетүүнү баштоого чейин "Кыргызалтынга" Кыргызстандын "Тарыхый-маданий мурастарды коргоо жана пайдалануу жөнүндө" мыйзамынын талаптарын сактоо сунушталды.
Тескеменин аткарылышын көзөмөлдөө милдети Президенттин жана Министрлер Кабинетинин чечимдеринин аткарылышын көзөмөлдөө башкармалыгына жүктөлдү.
Андаш кени — бул Талас облусунда жайгашкан алтын-жез кени. Анын чалгындалган кору болжол менен 17,6 млн тонна руданы түзүп, анын курамында 19,6 тоннадай алтын жана жез бар. Бул долбоор мурда Kentor Gold тарабынан иштелип чыккан. Кийин жергиликтүү тургундардын каршылыгынан улам компания кенди сатуу ниетин билдирген.
