Кыргызстанда басылып чыккан улуттук валюта качан жүгүртүүгө чыгарылат?

Кыргызстанда улуттук валюта, сомду өз аймагында чыгаруу иштери активдүү жүргүзүлүүдө. КРнын Улуттук банкынан маалыматына караганда, бул аракет КРнын Президенти Садыр Жапаров тарабынан берилген банкнотторду өлкө ичинде даярдоо боюнча буйругун аткаруу алкагында жүзөгө ашырылууда.

Улуттук банк учурда жаңы банкнотторду чыгарууга байланышкан бардык уюштуруу жана техникалык иштерди жүргүзүп жатат. Ал эми жаңы акчалардын сапаты, коопсуздук деңгээли, коргоо элементтери жана жүгүртүүгө чыгаруу тартиби тууралуу толук маалымат банкноттор жүгүртүүгө чыккан кезде гана коомчулукка маалым болоорун Улуттук банктан кабарлашты.

Эске салсак, ушул жылдын 27-мартында Президент Садыр Жапаров жеке баракчасы аркылуу "бул күн Кыргызстан үчүн тарыхый күн” экенин белгилеп, алгачкы жолу улуттук валютабыз өзүбүздө басылып чыкканын жарыялаган. Өлкө башчынын билдирүүсүнө караганда,  колубузда тийиштүү сертификат бар болгондуктан акчанын коргоо элементтери да жогорку деңгээлде болуп, аны жасалмалоого мүмкүн болбойт.

Буга чейин кыргыз сому чет өлкөдө гана басылып келген.