"Ак-Тилек – автожол" өткөрмө пунктунда мыйзамсыз 18,5 млн сомдук товар кармалды
"Ак-Тилек – автожол" өткөрмө пунктунда мамлекеттик чек ара аркылуу товарларды мыйзамсыз алып өтүүнүн ири партиясы аныкталганын Мамлекеттик чек ара кызматынын басма сөз кызматы билдирди.
"Казакстандан келе жаткан кыргыз жараны А.М.В. (1988-жылы туулган) башкарган Volvo Truck үлгүсүндөгү жүк ташуучу унаа өткөрмө пунктуна тиешелүү товар коштоочу документтери жок эл керектөөчү товарлар менен келген", — деп айтылат маалыматта.
Текшерүүнүн жүрүшүндө төмөнкү товарлар табылган:
- чарбалык буюмдар,
- кабелдер,
- курулуш шаймандары,
- кондитердик азыктар,
- кофе,
- бут кийимдер жана башка эл керектөөчү товарлар.
Жүктүн алдын ала баасы 18,5 млн сомдон ашат.
Тиешелүү документтер таризделгенден кийин, транспорт каражаты, айдоочу жана жүк андан аркы териштирүү үчүн тиешелүү органдардын кызматкерлерине өткөрүлүп берилди.
