Дагы 14 жылдан соң 33 өлкө суу тартыштыгына дуушар болот
2040-жылга чейин 33 өлкө суу тартыштыгына дуушар болорун "Казинформ" Анадолу агенттигинин маалыматына таянып жазды.
Калктын өсүшү, климаттын өзгөрүшү жана керектөөнүн көбөйүшү суу ресурстарына болгон суроо-талапты күчөтүп, суу коопсуздугун негизги глобалдык көйгөйгө айландырууда.
Божомолдор боюнча, 2040-жылга чейин 33 өлкө "суу тартыштыгы өтө жогору" зонасында болот.
Дүйнөлүк ресурстар институту (WRI) 167 өлкөнү камтыган изилдөөсүндө калктын өсүшү, шаарлардын өнүгүшү жана климаттын өзгөрүшүнүн шартында суу запастарынын тездик менен азайып баратканын көрсөтүп турат.
Бул көйгөй өзгөчө Жакынкы Чыгышта курч, анткени ал жерде суу коопсуздугу дүйнөдөгү эң төмөнкү деңгээлде. Региондогу көптөгөн өлкөлөр жер астындагы сууларга жана кымбат баалуу деңиз суусун тузсуздандыруу технологияларына таянат.
ЮНЕСКОнун маалыматы боюнча, Жер шарында 2 миллиарддан ашык адам ичүүчү сууга муктаж.
