АКШ Ормуз кысыгын толугу менен бөгөттөгөнү маалым болду
АКШ Ирандын портторуна толук деңиз блокадасын киргизди. Ислам Республикасынын экономикасынын болжол менен 90%ын камсыздаган эл аралык деңиз соодасы дээрлик толугу менен токтотулганын АКШнын Борбордук командачылыгы — CENTCOM билдирди.
"Иран портторуна карата блокада толук ишке ашырылды. Америкалык аскерлер Иранга жана Ирандан чыккан деңиз соодасын толугу менен токтотту", — деди Брэд Купер.
Маалыматка ылайык, алгачкы 24 саат ичинде бир да кеме америкалык блокаданы бузуп өтө алган эмес. Ал эми алты соода кемесине Оман булуңундагы иран портуна кайтып келүү буйругу берилген.
Ошол эле учурда CNBC басылмасы деңиз чалгындоо компаниясы Windward берген маалыматка таянып, блокаданын биринчи күнү кеминде эки кеме Ормуз кысыгы аркылуу өткөнүн жазды. Алардын бири — АКШ санкциясына кирген Кытай компаниясына таандык Rich Starry танкери. MarineTraffic маалыматы боюнча, ал учурда Омандагы Эль-Хасаб шаарынын чыгыш тарабында жайгашкан.
АКШ 13-апрелде кечинде Иран портторуна кирген жана чыккан бардык деңиз транспортуна карата Ормуз кысыгында аскер-деңиз блокадасын киргизген. Чектөөлөр Иранга тиешелүү эмес портторго бара жаткан кемелерге тиешелүү эмес. Ал эми азык-түлүк, дары-дармек жана башка гуманитардык жүктөр текшерүүдөн өткөндөн кийин өткөрүлүшү мүмкүн.
Иранда бул блокаданы ишке ашпай турган кадам деп баалашты. Ага каршы Россия, Кытай жана Улуу Британия сыяктуу айрым мамлекеттер, ошондой эле TotalEnergies сыяктуу компаниялар чыгышты. The Wall Street Journal басылмасы жазгандай, Сауд Аравиясы жана Жакынкы Чыгыштагы башка мунай экспорттоочу өлкөлөр АКШдан блокаданы токтотууну талап кылууда. Алар Иран союздаштары болгон хуситтер аркылуу Баб-эль-Мандеб кысыгы да жабылып калышынан кооптонушууда.
АКШ президенти Дональд Трамп Ормуз кысыгын блокадалоо тууралуу чечимди Исламабадда өткөн сүйлөшүүлөр ийгиликсиз аяктагандан кийин кабыл алган. Азыр жаңы сүйлөшүүлөрдү өткөрүү маселеси талкууланууда. Reuters жана The Atlantic маалыматына караганда, алар ушул жумада өтүшү мүмкүн.
