Кыргызстандан Россияга автоунаа жүк ташуулары 56%га кыскарды – ATI.SU
2026-жылдын биринчи кварталында Кыргызстанда эл аралык автомобиль жүк ташуу тармагында олуттуу дисбаланс байкалган. Эл аралык "ATI.SU логистикалык платформасынын" маалыматына ылайык, өлкөгө товар алып келүүгө болгон суроо-талап кескин өсүп жатканда, экспорт көрсөткүчтөрү кыйла төмөндөп кеткен.
Кыргызстанга жүк жеткирүү боюнча өтүнмөлөрдүн саны жылдык эсепте 24%га өскөн. 2025-жылдын төртүнчү кварталына салыштырмалуу өсүш 44%ды түзгөн.
Негизги агым төмөнкү өлкөлөрдөн камсыздалган: Россия — +23%, Беларусь — +34%, Казахстан — +10%.
Импорттун болжол менен үчтөн бири мурдагыдай эле Кытайдан келет. Импорттук жүк ташуунун баасы орто эсеп менен 7%га жогорулаган.
Автомобиль транспорту менен товарларды сыртка чыгарууга болгон суроо-талап жыл ичинде 52%га кыскарган. Өткөн жылдын аягына салыштырмалуу төмөндөө 34%га жеткен. Эң чоң төмөндөө Россия багытында катталган — өтүнмөлөрдүн саны 56%га азайган. Экспорттук жүк ташуунун тарифтери 8%га арзандаган.
"Суроо-талаптын динамикасы тышкы соода менен байланыштуу. Көрсөткүчтөргө Россияга киргизилген товарларга көзөмөлдүн күчөтүлүшү жана параллелдүү импорттун кыскарышы таасир этүүдө. Ошол эле учурда экспорттун бир бөлүгү платформаларды айланып өтүп, түз келишимдер аркылуу жүргүзүлүп жатат. Ал эми ЕАЭБ ичиндеги каботаждык ташуулар статистикада көбүрөөк чагылдырылууда", — деп түшүндүрдү ATI.SU платформасынын Кыргызстандагы өкүлчүлүгүнүн директору Эмирлан Бейилбаев.
