Кыргызстан менен Доминикандын соода-экономикасын өнүктүрүү боюнча талкуу өттү
20-апрелде Тышкы иштер министринин орун басары Медер Абакиров резиденциясы Москва шаарында жайгашкан Доминикан Республикасынын Кыргыз Республикасындагы атайын жана ыйгарым укуктуу элчиси Алехандро Ариастын ишеним грамоталарынын көчүрмөсүн кабыл алды. Бул тууралуу Тышкы иштер министрлигинин басма сөз кызматы билдирди.
Маалыматка ылайык, жолугушуунун жүрүшүндө тараптар эки өлкө ортосундагы соода-экономикалык мамилелерди, анын ичинде туруктуу өнүктүрүү, айыл чарба, билим берүү, спорт жана туризм тармагындагы мамилелерди чыңдоого өз ара кызыкдар экендиктерин билдиришти.
Тараптар Кыргызстан менен Доминикан Республикасынын ортосундагы эл аралык уюмдардын алкагында ийгиликтүү кызматташууну белгилешти.
Жолугушуунун соңунда белгиленген маселелерди ишке ашырууну алдыга жылдыруу үчүн өз ара расмий сапарларды жана саясий консультацияларды уюштуруу боюнча биргелешип иштөөнү улантууга макулдашышты.
