Кыргызстан менен Грузия соода-экономикалык кызматташтыгын жандантат

11-июнда Бишкек шаарында Экономика жана коммерция министрлигинин имаратында кыргыз-грузин соода-экономикалык кызматташтык боюнча өкмөттөр аралык комиссиясынын экинчи жыйыны болуп өттү. Бул жыйын комиссиянын он жылдык тыныгуудан кийинки ишмердүүлүгүнүн кайра жанданышын белгиледи. Бул тууралуу аталган министрликтен билдиришти.

Маалыматка ылайык, өкмөттөр аралык комиссиянын ишине ошондой эле Грузиянын Айлана-чөйрөнү коргоо жана айыл чарба министри Давид Сонгулашвили катышты.

Комиссиянын теңтөрагалары болуп Экономика жана коммерция министри Бакыт Сыдыков жана Грузиянын экономика жана туруктуу өнүгүү министри Мариам Квривишвили дайындалган.

Жыйынды ачып жатып, Бакыт Сыдыков жолугушуунун тарыхый маанисин белгилеп, акыркы он жыл ичинде дүйнөлүк экономика олуттуу өзгөрүүлөргө дуушар болгонун, бул мурда жетишилген макулдашууларды жаңылоону жана эки тараптуу кызматташуунун жаңы багыттарын иштеп чыгууну талап кыларын айтты.

Жыйындын жүрүшүндө тараптар Кыргызстан менен Грузиянын ортосундагы соода-экономикалык, инвестициялык, транспорттук-логистикалык, туристтик, агроөнөр жай жана маданий-гуманитардык тармактардагы кызматташтыктын олуттуу потенциалын белгилешти.