Саламаттык сактоо министри ТМУ өлкөлөрүнө бирдиктүү фарм-платформа түзүүнү сунуштады
2-октябрда Бишкекте Түрк мамлекеттер уюмунун Саламаттык сактоо министрлеринин 6-жолугушуусу өттү. Бул тууралуу министрликтин басма сөз кызматы кабарлады.
Маалымдалгандай, жолугушуунун алкагында Кыргызстандын Саламаттык сактоо министри Дамир Осмонов Азербайжан, Казакстан, Өзбекстан жана Түркиянын делегациялары, ошондой эле ТМУнун Башкы катчысы Кубанычбек Омуралиев менен өз-өзүнчө жолугушууларды өткөрдү.
Сүйлөшүүдө негизги басым саламаттык сактоодогу макулдашууларды конкреттүү долбоорлорго айландырууга жасалды.
Атап айтканда, кадрдык потенциалды өнүктүрүү - адистер менен алмашуу, стажировка, квалификацияны жогорулатуу маселелери талкууланды. Ошондой эле дары-дармек менен камсыз кылуу, дарылардын сапаты жана коопсуздугу, бааны жөнгө салуу жана өндүрүштү жергиликтештирүү боюнча сүйлөшүүлөр болду.
Азербайжан тарап саламаттык сактоону санариптештирүү жаатындагы тажрыйбасы менен бөлүштү. Кыргызстан болсо бирдиктүү фармацевтикалык платформа түзүү сунушун берди.
Казакстан менен болгон жолугушууда мурда өткөн Казакстан медицинасынын күндөрүнүн жыйынтыгы талкууланды. Анын алкагында Чүй облусунун 1300дөн ашык тургунуна консультация жана операциялар жасалып, 7 меморандумга кол коюлган.
Түркия менен болсо Бишкектеги Кыргыз-Түрк достук ооруканасын өнүктүрүү жана трансплантология багытындагы кызматташтык талкууланды.
Тараптар кызматташтыкты мындан ары да улантууга макулдашты.
