Жаратылыш ресурстары министрлигинде 100 млн сомдон ашуун каржылык кемчилик аныкталды
Кыргыз Республикасынын Эсептөө палатасы Жаратылыш ресурстары, экология жана техникалык көзөмөл министрлигинде, анын карамагындагы мекемелерде жана “Кыргызгеология” мамлекеттик ишканасынын “Көмөкчү чарба” филиалында жүргүзүлгөн аудиттин жыйынтыгын жарыялады.
Аудит 2024-жылдан 2025-жылдын 31-декабрына чейинки мезгилди камтып, эсеп-кысап жүргүзүү, бюджеттик тартипти сактоо жана мамлекеттик мүлктү пайдалануу багыттарын текшерген.
Текшерүүнүн жүрүшүндө товардык-материалдык баалуулуктардын 939 миң сомдон ашык жетишсиздиги аныкталган. Анын басымдуу бөлүгү “Көмөкчү чарба” филиалына туура келет. Ошондой эле аталган филиалда эсеп жана отчеттуулук жүргүзүүдөгү 9,4 млн сомдук, ал эми мүлктү пайдалануу жана активдерди эсепке алуудагы 7 млн сомдон ашык мыйзам бузуулар катталган.
“Кыргызгеология” мамлекеттик ишканасында кен байлыктарын пайдалануу үчүн төлөнүүчү бонус боюнча 3,4 млн сом кошумча эсептелсе, эмгек акы төлөөгө байланыштуу 7,2 млн сомдук кемчиликтер аныкталган.
Аудит мамлекеттик каражаттарды натыйжасыз пайдалануу фактыларын да көрсөткөн. Айлана-чөйрөнү булгагандыгы үчүн төлөмдөрдү өндүрүү боюнча жетиштүү иштер жүргүзүлбөгөндүктөн, чарба субъекттеринин карызы министрликтин борбордук аппаратында 46,7 млн сомго, ал эми Чүй регионалдык башкармалыгында 14,1 млн сомго жеткен.
Мындан тышкары, Балыкчы шаарындагы экологиялык постту жана кирүү аркасын оңдоо иштеринде келишимдик талаптар бузулуп, жумуштар толук аяктай электе 5,3 млн сомдук каражаттын 90 пайызы алдын ала төлөнүп берилгени белгилүү болгон.
Аудиттин жүрүшүндө “Озон борбору” мекемесинде дагы бир катар мыйзам бузуулар аныкталган. Атап айтканда, эмгек келишимдерин түзбөстөн жана жумуш убактысын эсепке албастан 10,7 млн сом өлчөмүндө эмгек акы төлөнгөн. Ошондой эле мамлекеттик сатып алуулар боюнча талаптар сакталбай, 7,6 млн сомдук товарлар жана кызмат көрсөтүүлөр түз сатып алынганы белгиленген.
Жыйынтыгында Эсептөө палатасы министрликке аныкталган каржылык кемчиликтерди жоюу жана мамлекеттик каражаттарды пайдалануунун натыйжалуулугун жогорулатуу боюнча тиешелүү сунуштарды берди.
