Дастан Бекешев: Жаштар ашыкча насыя алып жатышат
Жогорку Кеңештин депутаты Дастан Бекешев Улуттук банктын 2025-жылдагы ишмердүүлүгү тууралуу отчетун кароо учурунда өлкөнүн каржы секторундагы бир катар көйгөйлөргө көңүл буруу зарылдыгын билдирди.
Депутаттын социалдык баракчасында жазган билдирүүсүнө караганда, бюджет боюнча комитеттин жыйынында Улуттук банктын отчету угулуп, анда каржы кызматтарын пайдалануучулардын укуктарын коргоо маселеси, жаштардын ашыкча насыяга батышы жана мүмкүнчүлүгү чектелген жарандар үчүн банк кызматтарынын жеткиликтүүлүгү талкууланган.
Депутат учурда каржы кызматтарын керектөөчүлөрдүн укуктары жетиштүү деңгээлде корголбой жатканын белгилеп, жаштар арасында насыя жүктөмүнүн көбөйүшү кооптондуруучу көрүнүш экенин айтты. Ошондой эле банктык кызматтар мүмкүнчүлүгү чектелген адамдар үчүн дагы эле толук жеткиликтүү эмес экенине көңүл бурду.
Мындан тышкары, Бекешев каржы тармагында башка да системалуу маселелер бар экенин белгилеп, Улуттук банк бул багыттарда ишти күчөтүшү керектигин билдирди. Депутаттын маалыматына ылайык, Улуттук банктын өкүлдөрү көтөрүлгөн көйгөйлөрдү чечүү боюнча ишти жакшыртууга убада беришти.
