Балыкчы–Тамчы–Чолпон-Ата темир жолу экономика менен туризмге дем берет
КРнын Президенти Садыр Жапаров 14-июнда Ысык-Көл облусуна болгон иш сапарынын алкагында Балыкчы–Тамчы–Чолпон-Ата темир жолунун курулушуна мезгил кутусун салуу аземине катышты.
Мамлекет башчысы жаңы темир жол долбоору өлкөнүн транспорттук инфраструктурасын өнүктүрүүдө маанилүү кадам экенин белгилеп, анын аймактын экономикасына жана туристтик потенциалына чоң салым кошорун айтты.
Президенттин айтымында, акыркы жылдары өлкөдө темир жол тармагынын көрсөткүчтөрү кыйла жакшырды. 2025-жылдын жыйынтыгында темир жол аркылуу ташылган жүктүн көлөмү 10 миллион тоннага жетип, 2021-жылга салыштырмалуу 36% өскөн. Ал эми жүргүнчүлөрдүн саны төрт жыл ичинде 255 миңден 432 миң адамга чейин көбөйгөн.
"Иштин мындай ыкчам ыргагы тармактын ишмердүүлүгү жакшырып, темир жолдун өлкөнүн транспорттук системасындагы ролу кеңейип жатканын айгинелейт. Натыйжада элибиздин темир жол транспортуна болгон ишеними артып баратат", — деди Садыр Жапаров.
Президент ошондой эле учурда стратегиялык мааниге ээ болгон Кытай–Кыргызстан–Өзбекстан темир жолунун курулушу активдүү жүрүп жатканын белгилеп, ички темир жол тармагын өнүктүрүү үчүн Балыкчы–Кочкор–Кара-Кече–Макмал багыты боюнча да иштер жүргүзүлүп жатканын айтты.
Жаңы Балыкчы–Тамчы–Чолпон-Ата темир жолунун узундугу болжол менен 86 чакырымды түзөт. Долбоордун алкагында темир жолду Ысык-Көл эл аралык аэропорту менен интеграциялоо каралып, заманбап мультимодалдык транспорттук түйүн түзүлөт.
Мамлекет башчысынын белгилешинче, долбоор толук ишке киргенден кийин жылына 5 млн тоннага чейин жүк ташууга мүмкүнчүлүк түзүлөт.
"Жаңы темир жол курулуш материалдарын жана башка жүктөрдү жеткирүүнү камсыздап, аймактын туристтик дараметин өнүктүрүүгө жана жүргүнчү ташууларды кеңейтүүгө өбөлгө болот", — деди Президент.
Долбоорду ишке ашыруунун жүрүшүндө 400дөн ашуун жаңы жумуш орду түзүлүп, темир жол пайдаланууга берилгенден кийин дагы 200дөн ашык туруктуу жумуш оруну ачылары күтүлүүдө.
Садыр Жапаров ошондой эле ири инфраструктуралык долбоорлорду ишке ашырууда чет элдик адистердин тажрыйбасын пайдалануу зарылдыгын белгилеп, ошол эле учурда кыргызстандык инженерлер менен куруучуларды даярдоо иштери да улантылып жатканын билдирди.
Анын айтымында, Балыкчы–Тамчы–Чолпон-Ата–Каракол темир жолунун курулушун Кыргызстан өз күчү менен ишке ашырууга толук мүмкүнчүлүккө ээ.
Президент сөзүнүн соңунда жаңы темир жол долбоору өлкөнүн экономикасын, туризмин жана транспорттук байланыштарын өнүктүрүүгө кызмат кыларын белгилеп, ал келечекте Ысык-Көл аймагынын инвестициялык жагымдуулугун арттыра турганын кошумчалады.
