Ишкерлерди колдоо боюнча жаңы чаралар кабыл алынды

КРнын Президентинин «Салык салуу жана салыктык башкаруу системасын өркүндөтүү боюнча чаралар жөнүндө» Жарлыгына ылайык, ишкердикти өнүктүрүүгө жана салыктык башкаруунун натыйжалуулугун жогорулатууга багытталган бир катар жаңы чаралар каралды.

Документке ылайык, ишкерлерге 2026-жылдын 1-октябрына чейин бирдиктүү салык режиминен жалпы салык режимине өтүү мүмкүнчүлүгү берилет. Бул бизнес өкүлдөрүнө өз ишмердүүлүгүнө ылайыктуу салык режимин тандоого жана ишкердикти кеңейтүүгө шарт түзөт.

Мындан тышкары, 2022-жылы кыргыз-тажик чек арасындагы окуялардан кийин Баткен облусунда турак жайларды курууга катышкан курулуш компанияларынын салыктык карыздарын эсептен чыгаруу каралган. Өкмөт бул чечимди социалдык маанилүү долбоорлорду ишке ашырууга салым кошкон ишкерлерди колдоо чарасы катары баалоодо.

Жарлыкта ошондой эле ишкерлерге 2025-жылдын 1-апрелине чейин мыйзамдаштырылган товардык калдыктар боюнча маалыматтарды тактоо мүмкүнчүлүгү берилери белгиленген. Бул кошумча салыктык эсептөөлөрдүн алдын алууга жардам берет.

Кыймылсыз мүлккө байланыштуу дагы жеңилдиктер каралган. Мамлекеттик кадастрдын маалыматтарынын негизинде салыктарды автоматтык эсептөө системасына өтүүгө байланыштуу салык төлөөчүлөр 2026-жыл үчүн эсептелген суммалар боюнча туум төлөөдөн бошотулат.

Ошол эле учурда бийлик көмүскө экономиканын үлүшүн азайтуу жана товарлардын мыйзамсыз жүгүртүлүшүнө каршы күрөштү күчөтүү ниетинде. Бул максатта контрабандалык товарлар үчүн жоопкерчиликти катаалдаштыруу, анын ичинде мыйзам бузууга байланыштуу айып пулдарды товарлардын наркына жараша белгилөө сунушталууда.

Жаңы чаралар ишкерлер үчүн салыктык жүктү жеңилдетүүгө, бизнести мыйзамдаштырууга жана өлкөдөгү ишкердик чөйрөнү жакшыртууга өбөлгө түзмөкчү.