Кыргызстанда курулуштун көлөмү 1,6 эсеге көбөйдү
Кыргызстанда 2026-жылдын январь-май айларында курулуш тармагындагы иштердин көлөмү 1,6 эсеге көбөйдү. Ошондой эле дүң жана чекене соода жүгүртүүсү 10,4%, айыл чарба продукциясынын көлөмү 3,7% өстү. Бул тууралуу Улуттук статистика комитети билдирди.
Ошол эле учурда, үстүбүздөгү жылдын январь-май айларында республика боюнча керектөө бааларынын жана тарифтеринин өсүшү өткөн жылдын декабрь айына салыштырмалуу 4,8% түзгөн.
Анын ичинде тамак-аш азыктары жана алкоголсуз суусундуктар 4,8%, алкоголдук ичимдиктер жана тамеки буюмдары 6,5%, азык-түлүк эмес товарлар 2,8%, ал эми калкка көрсөтүлүүчү кызмат көрсөтүүлөрдүн тарифтери 7,1% жогорулаган.
Керектөө бааларынын жана тарифтеринин өсүшү өлкөнүн бардык аймактарында катталган. Эң жогорку көрсөткүч Ош облусунда байкалып, баалардын өсүшү 10,3% түзгөн. Бул негизинен алкоголдук ичимдиктер менен тамеки буюмдарынын 15,1%, азык-түлүк эмес товарлардын 8,8% жана кызмат көрсөтүүлөрдүн тарифтеринин 17,1% кымбатташы менен байланыштуу.
