"Жашыл кепилдиктер" компонентин колдоого 59 млн доллар бөлүнөт
Кыргызстанда экологиялык жана энергияны үнөмдөөчү долбоорлорду каржылоону кеңейтүүгө багытталган жаңы демилге ишке кирүүдө. Дүйнөлүк банктын долбоорунун алкагындагы «Жашыл кепилдиктер» компоненти үчүн 59 миллион $ көлөмүндө каржылоо каралды.
Кепилдик фондунун маалыматына ылайык, 2026-жылдын 11-июнунда “Кепилдик фонду” ААКсы менен КРнын Финансы министрлигинин ортосунда тиешелүү субсидиардык келишим кабыл алынган. Ага “Кепилдик фонду” ААКсынын Башкармасынын төрагасы Малик-Айдар Абакиров жана Финансы министринин орун басары Умутжан Аманбаев кол коюшкан.
Билдирүүгө караганда, жаңы механизм ишкерлер үчүн экологиялык таза технологияларды киргизүүгө жана бизнестин энергия натыйжалуулугун жогорулатууга багытталган долбоорлорду ишке ашырууга кошумча мүмкүнчүлүктөрдү түзөт.
“Экономиканын жашыл трансформациясы жеткиликтүү каржылоосуз мүмкүн эмес. Жаңы кепилдик механизми ишкерлерге заманбап экологиялык технологияларды киргизүүгө жана бизнестин энергия натыйжалуулугун жогорулатууга багытталган долбоорлорду ишке ашырууга мүмкүндүк берет. “Кепилдик фонду” үчүн бул долбоорго катышуу кепилдик колдоо системасын өнүктүрүүдө жана Кыргызстанда туруктуу каржылоо принциптерин илгерилетүүдө маанилүү кадам болуп саналат”– деди Малик-Айдар Абакиров.
Долбоор өлкөдө жашыл экономиканы өнүктүрүүгө, көмүр кычкыл газынын бөлүнүп чыгышын азайтууга жана экологиялык жоопкерчиликтүү ишкердикти колдоого өбөлгө түзөт. Ошондой эле бул демилге чакан жана орто бизнес үчүн жашыл долбоорлорду каржылоонун жеткиликтүүлүгүн арттырат деп күтүлүүдө.
