Бишкекте өтө турган инвестициялык бизнес-форумга даярдык талкууланды
Инвестициялар боюнча улуттук агенттик Шанхай кызматташтык уюмуна мүчө мамлекеттердин өкүлдөрү менен эксперттик видеоконференция өткөрүп, Бишкекте өтө турган Инвестициялык бизнес-форумга даярдык маселелерин талкуулады.
Маалыматка ылайык, жолугушуу 24–25-июнда Бишкекте өтө турган ШКУнун Инвестициялык бизнес-форумуна даярдык көрүү алкагында уюштурулган. Анын жүрүшүндө расмий жана бизнес-делегациялардын катышуусу, катышуучулардын курамын түзүү, ошондой эле уюштуруучулук жана протоколдук маселелер каралды.
Талкуунун негизги темаларынын бири ШКУнун Инвестициялык бизнес-форумунун жыйынтыктоочу биргелешкен резолюциясынын долбоору болду. Катышуучулар документ боюнча сунуштарын айтып, уюмга мүчө мамлекеттердин ортосундагы инвестициялык кызматташтыкты тереңдетүүнүн маанисине токтолушту.
Ошондой эле кыргыз тарап форумдун даярдык иштери тууралуу маалымат берип, иш-чаранын программасын, панелдик сессиялардын темаларын жана бизнес-программанын негизги багыттарын тааныштырды.
Видеоконференциянын жыйынтыгында ШКУга мүчө өлкөлөрдүн өкүлдөрү форумга катышууга даяр экендиктерин ырастап, биргелешкен резолюцияга кол коюу демилгесин колдошту.
ШКУнун Инвестициялык бизнес-форуму мамлекеттик органдардын өкүлдөрүн, инвесторлорду, бизнес-коомчулукту жана өнүктүрүү институттарын бириктирген маанилүү аянтча болуп, экономикалык байланыштарды чыңдоого өбөлгө түзөрү белгиленди.
