Кыргызстан менен Португалия кош салык салуудан качуу боюнча сүйлөшүүдө
Кыргызстан менен Португалиянын расмий өкүлдөрү кирешеге кош салык салуудан качуу жана салык төлөөдөн баш тартуунун алдын алуу боюнча макулдашууну талкуулап жатышат. Бул тууралуу Экономика жана коммерция министрлигинен билдиришти.
Белгиленгендей, бул иш-аракеттер эки өлкөнүн соода-экономикалык кызматташтыгын кеңейтүүгө, инвестициялык жагымдуулукту жогорулатууга жана биргелешкен долбоорлорду ишке ашыруу үчүн ыңгайлуу шарттарды түзүүгө өбөлгө түзөт.
Кош салык салуудан качуу тууралуу макулдашуулар мамлекеттердин салык салуу укуктарын тактап, эл аралык ишкердикте пайда болгон кош салык жүгүн азайтууга багытталган. Ошондой эле мындай документтер салык төлөөдөн качуунун алдын алууга жана өлкөлөр ортосунда маалымат алмашууну күчөтүүгө жардам берет.
Министрлик салык тармагындагы эл аралык-укуктук алкакты кеңейтүү максатында чет мамлекеттер менен эки тараптуу макулдашууларды түзүү боюнча иштерди улантып жатканын билдирди.
