Мамлекеттик банктар 130дан ашык компания менен кызматташууну токтотту
Кыргызстандын мамлекеттик банктары санкциялык тобокелдиктерди азайтуу жана комплаенс-көзөмөлдү күчөтүп, айрым компаниялар менен ишкердик мамилелерин токтотту. Бул тууралуу 23-июнда Президенттин өзгөчө тапшырмалар боюнча атайын өкүлү Бакыт Сыдыковдун төрагалыгы алдында өткөн жумушчу кеңешмеде маалым болду.
Жыйында европалык тараптан түшкөн кайрылуулардын негизинде санкциялык тобокелдиктерге байланыштуу болушу мүмкүн болгон компаниялардын ишмердүүлүгү жана каржы тармагындагы көзөмөл чаралары талкууланды.
Маалыматка ылайык, мамлекеттик банктар кардарларды жана төлөмдөрдү күн сайын Европа Биримдиги, Улуу Британия жана АКШ баштаган өлкөлөрдүн санкциялык тизмелери боюнча текшерип турушат. Санкциялык тобокелдик белгилери аныкталган операциялар токтотулат же кошумча текшерүүгө алынат.
2026-жылдын 1-майынан тартып жүргүзүлгөн иштердин жыйынтыгында:
«Элдик Банк» болжол менен 80 компания менен ишкердик мамилелерин токтотту. Дагы 40ка жакын компания боюнча текшерүү жүрүүдө. Ошондой эле жыл башынан бери шектүү операциялар боюнча 13 миңге жакын билдирүү ыйгарым укуктуу органдарга жөнөтүлгөн.
«АБАНК» болжол менен 51 компания менен кызматташууну токтотту. Дагы 40ка жакын компания текшерилип жатат. Банк тарабынан шектүү операциялар боюнча 4 миңге жакын билдирүү жөнөтүлгөн.
Белгиленгендей, Кыргызстан каржылык туруктуулукту камсыз кылууга жана эл аралык өнөктөштөрдүн ишенимин сактоого багытталган иштерди улантууда.
