Ак-Талаанын өнөр жай өндүрүшү 4,3 эсеге өстү
Президент Садыр Жапаров 25-июнда Ак-Талаа районунун тургундары менен жолугушуп, аймактагы социалдык-экономикалык өнүгүү, инфратүзүмдүк долбоорлор жана келечектеги иштер тууралуу маалымат берди.
Мамлекет башчысы акыркы жылдары Ак-Талаада өнөр жай өндүрүшү 4,3 эсеге өскөнүн айтты. Беш жыл ичинде ондогон чакырым жолго асфальт төшөлүп, дагы кошумча жол тилкелери салынары белгиленди.
Ошондой эле район аймагында бир катар мамлекеттик мекемелердин имараттары жана жаңы мектептер курулуп жатканын, билим берүү мекемелеринин тармагы кеңейип жатканын кошумчалады.
“Айылдык ден соолук пункттары жаңыланып, фельдшердик-акушердик пункттардын материалдык-техникалык базасы чыңдалууда. 5 жыл аралыгында Ак-Талаа райондук жалпы дарыгерлик практикалык борборуна 6 унаа, анын ичинде 2 тез жардам унаасы, ошондой эле медициналык жабдыктар берилди”, - деди Садыр Жапаров.
Мындан тышкары, аймакта өнөр жай ишканалары ачылып, кичи ГЭСтин курулушу жүрүп жатат.
Президент Кытай–Кыргызстан–Өзбекстан темир жол долбоорунун маанисин өзгөчө белгилеп, ал аймактын жана өлкөнүн өнүгүүсүнө чоң мүмкүнчүлүк түзөрүн айтты.
