Бишкекте 150 млн долларлык 12 келишимге кол коюлду
Бишкекте Шанхай кызматташтык уюмуна мүчө мамлекеттердин ортосунда инвестициялык жана ишкердик кызматташтыкты өнүктүрүүгө багытталган бизнес форум өз ишин жыйынтыктады. Бул тууралуу Инвестициялар боюнча улуттук агенттиктен билдиришти.
Форумдун алкагында жалпы суммасы 150 млн долларды түзгөн 12 инвестициялык жана соода келишимине кол коюлду. Алардын катарында меморандумдар жана макулдашуулар бар.
Белгиленгендей, иш-чара мамлекеттик органдардын, бизнес коомчулуктун, инвестициялык фонддордун, өнүктүрүү институттарынын жана технологиялык компаниялардын өкүлдөрүнө жаңы өнөктөштүк мүмкүнчүлүктөрүн талкуулоого шарт түздү.
Инвестициялар боюнча улуттук агенттиктин башчысы Равшанбек Сабиров мындай аянтчалар диалогду конкреттүү долбоорлорго айландырууга өбөлгө түзөрүн айтты.
Белгилей кетсек, иш-чаранын алкагында 25-июнда “Жаштык Аренада” ШКУ өлкөлөрүнүн өнөр жай-инвестициялык кызматташтык көргөзмөсү өтөт.
