Кытай, Кыргызстандагы долбоорлордун ишке ашырылышын колдойт
Министрлер Кабинетинин төрагасынын орун Эрлист Акунбеков Кытай Эл Республикасынын Синьцзян-Уйгур автономдуу районуна болгон жумуш сапарынын алкагында, КЭРдин мамлекеттик кеңешинин Вице-премьери Дин Сюэсян менен жолукту. Бул тууралуу президенттик админстрациянын маалыматтык саясат бөлүмүнөн билдиришти.
Маалыматка ылайык, жолугушууда тараптар буга чейин эки мамлекеттин лидерлеринин жолугушууларында саясий, соода-экономикалык жана маданий-гуманитардык тармактарында мамилелерди мындан ары өнүктүрүү жана чыңдоо боюнча маанилүү макулдашууларга жетишилгенин белгилөө менен жаңы ишке ашырыла турган маселелер боюнча сүйлөшүүлөрдү жүргүздү.
Жолугушууда негизинен, эки өлкөнүн мамлекет башчыларынын саясий эрки жана жеке колдоосунун аркасында “Кыргызстан-Кытай-Өзбекстан” темир жолунун курулушу, кыргыз-кытай мамлекеттик чек арасында үчүнчү “Бедел” чек ара бекетинин ачылышы, “Барскоон – Бедел – Учтурфан – Аксу” унаа жолунун курулушу сыяктуу долбоорлордун ишке ашырылышы, эки өлкөнүн транспорттук байланышын бекемдөө жана соода-экономикалык кызматташтыгын өнүктүрүү үчүн бекем негиз түзүүгө багытталганы белгиленди.
Өз кезегинде Кытайдын Мамлекеттик кеңешинин вице-премьери Дин Сюэсян эки тарапты кызыктырган бардык долбоорлорду колдоого даяр экенин билдирип, “КЭРдин СУАР аймагы чоң аймактардын бири. Бул аймак аркылуу Кыргызстан менен өз ара соода жүргүзүүнүн өсүү тенденциясын сактап калуу үчүн бардык зарыл болгон күч-аракеттерди жумшайбыз жана бекеттердин үзгүлтүксүз иштешине кызыкдарбыз. Ошондой эле, кызматташуунун жаңы багыттары боюнча активдүү иш алып барууга кытай тарап даяр”, - деди ал.
Тараптар бүгүнкү жолугушууда каралган маселелерди жакында боло турган Кыргызстан менен Кытайдын ортосундагы соода-экономикалык кызматташтык боюнча өкмөттөр аралык комиссиянын жыйынында жана Кыргызстанда өтө турган Шанхай кызматташтык уюмуна мүчө мамлекеттердин башчыларынын саммитинин алкагында эки тараптуу документтерге кол коюуга жетишүү зарылдыгы макулдашылды.
