Бишкекте жакында оңдолгон фасаддарды өзгөртүүгө тыюу салынат
Бишкек шаардык мэриясы борбордо жакында бюджеттик каражаттардын эсебинен оңдолгон имараттардын фасаддарын өз алдынча өзгөртүүгө тыюу салынганын билдирди.
Маалыматка караганда, буга тиешелүү калаа бийлигинин 2026-жылдын 13-октябрындагы № 353-т тескемеси бар.
Борбордо төмөнкү даректерде жайгашкан имараттардын фасаддары оңдолгон:
- Чүй проспектиси боюнча Манас көчөсүнөн Абдрахманов көчөсүнө чейин;
- Жибек Жолу проспектиси боюнча Манас көчөсүнөн Абдрахманов көчөсүнө чейин;
- Айтматов проспектиси боюнча Жибек Жолу проспектисинен Семетей көчөсүнө чейин;
- Абдрахманов көчөсү боюнча Жибек Жолу проспектисинен Семетей көчөсүнө чейин.
"Фасаддардын түсүн, архитектуралык жана көлөмдүк-мейкиндик чечимдерин өз алдынча өзгөртүүгө, анын ичинде сырдоосун жана каптамасын алмаштыруудан, кире бериш топторун орнотуудан, балкондорду айнектөөдөн жана кайра жабдуудан, кондиционерлерди, көрнөктөрдү, жарнамалык жана башка конструкцияларды жайгаштырууга болбойт", - деп жазылат маалыматта.
Бишкек шаарынын аймагындагы имараттардын жана курулмалардын фасаддарына өзгөртүүлөр Бишкек шаардык кеңешинин 2024-жылдын 14-майындагы № 134 токтомуна ылайык, белгиленген тартипте гана жүргүзүлүүгө тийиш.
Мэрия КРнын Укук бузуулар жөнүндө кодексинин 107 жана 434-беренелерине ылайык, тышкы жарнаманы белгиленген эрежелерди бузуу менен жайгаштыргандыгы, ыйгарым укуктуу органдын мыйзамдуу чечимин, көрсөтмөсүн, тескемесин же талабын аткарбагандыгы үчүн жоопкерчилик каралганын эскертти.
