Кытайлык инвесторлор Кыргызстанга жер семирткич өндүрүүчү завод курууга кызыкдар
Министрлер Кабинетинин төрагасынын орун басары Эрлист Акунбеков Кытай Эл Республикасынын Синьцзян-Уйгур автономдуу районуна болгон жумуш сапарынын алкагында, Кытайдын бир катар компанияларынын жетекчилери менен инвестиция, өндүрүш жана кайра иштетүү тармактарында эки тараптуу кызматташуу маселелерин сүйлөштү.
Президенттик админстрациянын маалыматтык саясат бөлүмүнөн билдиришкендей, МинКаб Төрагасынын орун басары Эрлист Акунбеков “Sinopec” корпорациясынын башкармалыгынын Төрагасы Хоу Цицзюнь менен жолукту.
Анда мунай жана газ тармагындагы дүйнөдөгү эң ири компаниялардын ичинен алтынчы орунда турган “Sinopec” корпорациясы менен Кыргызстанда мунай жана газ тармагында, ошондой эле кайра жаралуучу энергия тармагында биргелешкен өндүрүш, кайра иштетүү ишканаларын түзүү долбоорлорун ишке ашыруу каралды.
Мындан тышкары, Эрлист Акунбеков “CIECC Planning and Design Research Co., Ltd.”, “Beijing Huafu Engineering Co., Ltd.” жана “Shaanxi Construction New Energy Co., Ltd.” сыяктуу кытай компанияларынын жетекчилери менен Кыргызстандын аймагында минералдык жер семирткичтерди өндүрүүчү заводду куруу боюнча сүйлөшүүлөрдү жүргүздү.
Сүйлөшүүлөрдүн жүрүшүндө кытай компаниялары Кыргызстанда карбамид жана азоттук жер семирткичтерди өндүрүүчү завод куруу долбоорун сунуштады.
Жолугушууда бул долбоордун инвестициялык потенциалы жогору экени жана долбоорду ишке ашыруу өлкөнүн азык-түлүк коопсуздугун чыңдоого, жергиликтүү дыйкандарды минералдык жер семирткичтер менен камсыз кылууга жана өлкөнүн өнөр жай потенциалын өнүктүрүүгө өбөлгө түзүлөөрү белгиленди.
