Сокулуктагы куш чарбасында тооктун саны 100 миңге жакындады
25-июнда президенттин өзгөчө тапшырмалар боюнча атайын өкүлү Бакыт Төрөбаев Сокулук районундагы "Эко Куш" куш багуучу чарбасында болуп, ишкананын өндүрүштүк абалы менен таанышты.
Өкмөттүн басма сөз кызматы билдиргендей, ишкана 2023-жылдан тартып эт багытындагы бройлер тоокторду өстүрүү менен алектенет. Өткөн жылы декабрда 40 миң суткалык балапан алынган болсо, учурда тооктун саны 100 миңге жакындады. Өндүрүм өлкө аймактарына туруктуу жеткирилип, калкты ата мекендик тоок эти менен камсыздоого салым кошууда.
Текшерүүнүн жүрүшүндө ишкананын өндүрүштүк мүмкүнчүлүгү жогору экени белгиленип, толук кубаттуулукта ишке киргизүү үчүн кошумча инвестиция талап кылынары айтылды. Жети өндүрүштүк корпус толук ишке кирсе, өндүрүш көлөмүн кыйла көбөйтүү мүмкүнчүлүгү жаралат.
Бакыт Төрөбаев өлкөдө куш чарбаларын өнүктүрүү, импортко көз карандылыкты азайтуу жана жаңы жумуш орундарын түзүү негизги максат экенин белгиледи.
