Кыргызстан экономикасын жыл сайын кеминде 8%га өстүрүүнү максат кылууда

Экономика жана коммерция министри Бакыт Сыдыков Евразия өнүктүрүү банкынын "Евразия 2030+: инвестициялар, өсүш жана жаңы мүмкүнчүлүктөр" аттуу пленардык жыйында сөз сүйлөдү.

Экономика министрлигинин басма сөз кызматы билдиргендей, иш-чара Евразия өнүктүрүү банкынын 20 жылдыгына арналып, Алматыда өткөн банктын жылдык жыйынынын уландысы болду.

Бакыт Сыдыков Кыргызстан "Евразия 2030+" күн тартибине жогорку экономикалык көрсөткүчтөр менен кирип жатканын белгилеп, 2021–2025-жылдары ички дүң жыйымдын орточо жылдык өсүшү 9,2%ды түзгөнүн, ал эми 2026-жылдын январь–май айларында экономика 12,2%га өскөнүн билдирди.

Министрдин айтымында, 2030-жылга чейинки Улуттук өнүгүү программасы жыл сайын кеминде 8% деңгээлде туруктуу экономикалык өсүштү камсыздоону көздөйт.

Негизги багыттар катары индустриалдаштыруу, өлкөнү аймактык логистикалык жана транзиттик хабга айлантуу, айыл чарба жана туризмди өнүктүрүү, ошондой эле жашыл энергетиканы кеңейтүү белгиленди.