Ишкерлерди колдоого багытталган жаңы кадамдар талкууланды
Экономика жана коммерция министрлигинде министрдин орун басары Беназир Нурланова Жапониянын эл аралык кызматташтык агенттигинин (JICA) өкүлдөрү менен жолугушту. Бул тууралуу министрликтин басма сөз кызматы билдирди.
Маалыматка ылайык, жолугушуунун жүрүшүндө чакан жана орто ишкерликти өнүктүрүү, бизнеске мамлекеттик колдоо көрсөтүү жана эки тараптуу кызматташтыкты кеңейтүү маселелери каралды.
Тараптар чакан жана орто ишкерликти колдоо институттарынын ишмердүүлүгүн өнүктүрүү, Кепилдик фондунун мүмкүнчүлүктөрүн кеңейтүү, ошондой эле Кыргыз-жапон адам ресурстарын өнүктүрүү борбору аркылуу ишкерлерди окутуу жана адистерди даярдоо маселелерине өзгөчө көңүл бурушту.
Жолугушуунун соңунда Экономика жана коммерция министрлиги менен JICA чакан жана орто бизнестин атаандаштыкка жөндөмдүүлүгүн арттырууга, ишкердик чөйрөнү өнүктүрүүгө жана өлкөнүн туруктуу экономикалык өсүшүнө багытталган стратегиялык өнөктөштүктү улантууга даяр экенин белгилешти.
