Кыргызстан менен Швейцария каржылык өнөктөштүктү чыңдоону көздөйт
Каржы министри Руслан Суйналиев Швейцариянын Экономика маселелери боюнча мамлекеттик катчылыгынын Экономикалык кызматташтык жана өнүгүү бөлүмүнүн жетекчиси, өкмөттүн соода келишимдери боюнча өкүлү Пьетро Лаццери менен жолугушту.
Министрликтен билдиришкендей, тараптар Кыргызстан менен Швейцариянын ортосундагы финансылык-экономикалык кызматташуунун учурдагы абалын жана келечектеги багыттарын талкуулашты. Өзгөчө көңүл чакан экономиканы колдоо, мамлекеттик башкарууну өнүктүрүү жана техникалык жардам көрсөтүү программаларын ишке ашырууга бурулду.
Мындан тышкары, Эл аралык валюта фондунун жана Дүйнөлүк банктын шайлоо округдарынын алдыдагы жолугушуусуна даярдык көрүү, ошондой эле Кавказ, Борбордук Азия жана Монголия менен кызматташууну кеңейтүү маселелери каралды.
Министр Руслан Суйналиев Швейцария өкмөтүнө Кыргызстанда жүргүзүлүп жаткан реформаларды колдоп келгени үчүн ыраазычылык билдирип, ишке ашырылып жаткан программалар мамлекеттик финансыны чыңдоого, бюджеттик башкарууну жакшыртууга жана экономикалык институттарды өнүктүрүүгө олуттуу салым кошуп жатканын белгиледи.
Жолугушуунун соңунда тараптар эки өлкөнүн өнөктөштүгүн чыңдоого жана Кыргызстандын туруктуу социалдык-экономикалык өнүгүүсүнө багытталган жаңы биргелешкен демилгелерди ишке ашырууга кызыкдар экенин ырасташты.
