Кыргызстан менен Пакистан соода-экономикалык долбоорлорду ишке ашырат
Инвестициялар боюнча улуттук агенттиктин башчысы Равшанбек Сабиров Пакистандын Лахор шаарындагы Кыргызстандын ардактуу консулу менен жолугушту.
Аталган мекеменин маалыматына ылайык, жолугушууда Кыргызстан менен Пакистандын ортосундагы инвестициялык жана соода-экономикалык кызматташуунун келечектүү багыттары талкууланды.
Пакистан тарап Кыргызстандын инвестициялык мүмкүнчүлүктөрү, артыкчылыктуу тармактары жана инвесторлор үчүн каралган мамлекеттик колдоо чаралары менен таанышты.
Равшанбек Сабиров Кыргызстан чет өлкөлүк өнөктөштөр менен өз ара пайдалуу кызматташууну өнүктүрүүгө жана биргелешкен долбоорлорду ишке ашырууга кызыкдар экенин белгиледи.
Жолугушууда туризм, адал индустриясы, этти кайра иштетүү жана өндүрүү, санариптик банктык кызматтар сыяктуу багыттар боюнча биргелешкен долбоорлорду ишке ашыруу мүмкүнчүлүктөрү каралды.
Тараптар инвестициялык байланыштарды кеңейтүү, маалымат алмашуу жана ишкердик кызматташууну өнүктүрүү боюнча макулдашышты.
