Кыргызстан Дүйнөлүк соода уюмунун укуктук борборуна мүчө болду
30-июнда Женева шаарында Кыргызстандын Дүйнөлүк соода уюмунун укук боюнча Консультациялык борборуна (ACWL) кошулуусу тууралуу протоколго кол коюу аземи болуп өттү. Бул тууралуу Экономика министрлиги билдирди.
Маалыматка ылайык, Кыргызстан аталган борборго мүчө болгон 47-өлкө болуп калды.
Протоколго Кыргызстандын Дүйнөлүк соода уюмунун алдындагы туруктуу өкүлү Омар Султанов жана Консультациялык борбордун аткаруучу директору Найл Мигер кол коюшту. Кол коюу аземине Норвегиянын ДСУ алдындагы туруктуу өкүлү, элчи Петтер Ольберг да катышты.
Белгиленгендей, Кыргызстандын борборго кошулуусу Норвегия Королдугунун каржылык колдоосу менен ишке ашты.
Кыргызстан бул борборго кошулуу менен бир катар мүмкүнчүлүктөргө ээ болот. Өлкө Дүйнөлүк соода уюмуна байланыштуу маселелер боюнча кошумча чыгымсыз юридикалык кеңештерди ала алат.
Ошондой эле соода талаштары чыккан учурда жеңилдетилген шартта укуктук жардам көрсөтүлөт жана талаштарды кароонун бардык баскычтарында эл аралык адистердин колдоосу болот.
Мындан тышкары, мамлекеттик кызматкерлер ДСУнун укуктук маселелери боюнча акысыз окутуудан өтүп, деңгээлин жогорулатууга шарт түзүлөт.
Тактай кетсек, АCWL — 2001-жылы түзүлгөн өкмөттөр аралык уюм. Анын негизги милдети — өнүгүп келе жаткан өлкөлөргө соода талаштарын жөнгө салуу маселелери боюнча юридикалык жардам көрсөтүү.
