Кыргызстан Эл аралык валюта фонду менен кызматташууну кеңейтет
Каржы министри Руслан Суйналиев Ташкентте Эл аралык валюта фондунун Швейцария-Польша шайлоочулар округу боюнча аткаруучу директору Патрик Лошевски менен жолугушту. Бул тууралуу министрликтин басма сөз кызматы билдирди.
Маалыматка ылайык, жолугушуу 29-30-июнда Өзбекстанда өтүп жаткан Дүйнөлүк банк жана Эл аралык валюта фондунун жыйынынын алкагында уюштурулган.
Тараптар макроэкономикалык туруктуулукту камсыз кылуу, мамлекеттик инвестицияларды башкарууну жакшыртуу, ошондой эле техникалык колдоо жана институттук дараметти көтөрүү маселелерин талкуулашты.
Кыргыз тарап Эл аралык валюта фонду менен кызматташууну жогору баалап, экономикалык реформаларды ишке ашырууда уюмдун сунуштары эске алынып келатканын белгиледи.
Жыйынтыгында тараптар кызматташтыкты мындан ары да чыңдоо жана артыкчылыктуу багыттар боюнча өз ара өнөктөштүктү кеңейтүүгө даяр экенин билдиришти.
