Климаттык каржылоо жана "жашыл" инвестициялар боюнча талкуу өттү
Экономика жана коммерция министрлигинде "Кыргызстанда климаттык каржылоо, ESG жана көмүртек рыногу: кызматташтык үчүн жаңы мүмкүнчүлүктөр" аттуу сессия өттү.
Министрликтин басма сөз кызматы билдиргендей, иш-чара Климаттык каржылоо борбору менен биргеликте уюштурулуп, ага мамлекеттик органдардын жана каржы кызматынын өкүлдөрү, ошондой эле өнөктөштөр катышты.
Жолугушууда туруктуу каржылоонун заманбап ыкмалары, климаттык долбоорлорду ишке ашыруу жана өлкөгө инвестиция тартуу маселелери талкууланды.
Катышуучуларга 2026–2030-жылдарга климаттык инвестициялык программа, улуттук ESG системасын түзүү, көмүртек рыногун өнүктүрүү жана климаттык каржылоону тартуу механизмдери тууралуу маалымат берилди.
Мындан тышкары, "жашыл" инвестицияларды өнүктүрүү, эл аралык каржы институттары менен кызматташууну кеңейтүү жана климаттык долбоорлорду ишке ашыруу багыттары каралды.
Тактап кетсек, ESG — бул уюмдардын экологияга, коомго жана башкаруу сапатына жоопкерчилигин баалоочу негизги талаптар. Ага айлана-чөйрөнү коргоо, социалдык жоопкерчилик жана ачык-айкын башкаруу багыттары кирет.
