Кичи, чакан жана орто ишканаларды туруктуу каржылоо долбоору ишке ашат
Кыргызстанда кичи, чакан жана орто ишканалар үчүн туруктуу каржы базарын өнүктүрүүгө багытталган жаңы долбоордун бет ачары өттү. Бул тууралуу Каржы министрлигинин басма сөз кызматы билдирди.
Маалыматтык жолугушууга Каржы министринин орун басары Нурбек Акжолов төрагалык кылып, ага коммерциялык банктардын жана башка каржы институттарынын өкүлдөрү катышты.
Иш-чарада аталган долбоордун негизги багыттары, аны ишке ашыруу жолдору, каржы уюмдарынын катышуу шарттары жана күтүлүүчү жыйынтыктар тааныштырылды.
Белгиленгендей, демилге Кыргызстан менен Дүйнөлүк банктын Эл аралык өнүктүрүү ассоциациясынын ортосунда 2025-жылдын 21-апрелинде түзүлгөн каржылоо келишиминин алкагында ишке ашырылууда.
Долбоордун алкагында кичи, чакан жана орто ишканалар үчүн туруктуу каржылоо мүмкүнчүлүктөрүн кеңейтүү, ошондой эле жашыл каржылоо инструменттерин өнүктүрүү каралган.
Долбоорду Финансы министрлиги мамлекеттик жана каржы институттары менен биргеликте коммерциялык банктар аркылуу ишке ашырат.
