Кыргыз делегациясы Сингапурда каржы институттары менен жолугушту
Кыргызстандын өкүлдөрү Сингапурда эл аралык рейтинг агенттиги, каржы институттары жана инвесторлор менен жолугушууларды өткөрдү. Бул тууралуу Экономика министрлигинин басма сөз кызматы билдирди.
Жолугушууларда Кыргызстандын экономикалык өсүшү, инвестициялык мүмкүнчүлүктөрү, жүргүзүлүп жаткан реформалар жана эл аралык капиталга чыгуу маселелери талкууланды.
Кыргыз тарап Moody’s өкүлдөрүнө өлкөдөгү макроэкономикалык көрсөткүчтөр, өнөр жайдын, туризмдин өнүгүшү, инфраструктуралык долбоорлор жана инвестициялык климат тууралуу маалымат берди.
Маалыматка ылайык, Кыргызстандын ички дүң өнүмү 2022-жылы жана 2023-жылы 9%, 2024-жылы 11,5%, 2025-жылы 11,1 %га өскөн. Ал эми 2026-жылдын январь–июнь айларында экономиканын өсүү темпи 12,2%ды түздү.
Экономика жана коммерция министринин орун басары Медербек Туманов өлкөнүн экономикасы мурдагыдай акча которууларга, "Кумтөр" кенине жана реэкспорттук соодага гана көз каранды эмес экенин белгиледи. Анын айтымында, өсүш барган сайын өнөр жай, кызмат көрсөтүү, туризм, инфраструктура жана жаңы инвестициялык долбоорлордун эсебинен камсыздалууда.
Мындан тышкары, Сингапурдун Валюталык башкармалыгы жана финансы секторунун өкүлдөрү менен жолугушуулар өтүп, банктык көзөмөл, санариптештирүү, эл аралык резервдерди башкаруу жана тажрыйба алмашуу маселелери талкууланды.
