Мамлекеттик өнүктүрүү банкынын уставдык капиталы 22 млрд 680 млн сомго жетет
Мамлекеттик өнүктүрүү банкынын уставдык капиталы 22,68 миллиард сомго чейин көбөйтүлөт. Бул тууралуу Кыргыз фондулук биржасынын билдирүүсүндө маалымдалды.
Маалыматка ылайык, банктын уставдык капиталына 1,5 гектар аянттагы жер тилкеси акчалай эмес салым катары киргизилет. Аталган мүлктүн бааланган наркы 266,15 миллион сомду түзөт.
Капиталды көбөйтүү үчүн банк кошумча 266 миң 150 даана жөнөкөй акция чыгарат. Бир акциянын баасы 1 миң сом болуп, чыгаруунун жалпы суммасы 266,15 миллион сомду түзөт.
Тактап кетсек, уставдык капитал — бул акционерлер салган акча жана мүлктүн жалпы суммасы. Ал банктын иш алып баруусунун негизги каржылык булагы болуп эсептелет.
