Жогорку Кеңешке алты айда 980 млн сомдон ашык каражат сарпталды

2026-жылдын январь-июнь айларында Жогорку Кеңеш 980,3 миллион сом чыгымдады. Бул бир жылга каралган 1,87 миллиард сомдун 52,4%ын түзөт. Маалыматтар "Ачык бюджет" порталында жарыяланды.

Ага ылайык, парламенттин чыгымдарынын басымдуу бөлүгү кызматкерлердин эмгек акыларына багытталып, 838,8 млн сом жумшалган. Анын ичине айлык маяналар, үстөк акылар, кошумча төлөмдөр жана Социалдык фондго төлөнүүчү чегерүүлөр кирет.

Товарларды жана кызмат көрсөтүүлөрдү сатып алууга 104,9 млн сом сарпталган. Бул каражаттар иш сапарларга, байланыш кызматтарына, мүлктү күтүүгө, товарларды сатып алууга жана өкүлчүлүк иш-чараларга кеткен.

Тактап айтканда, кызматтык иш сапарларга 16,4 млн сом жумшалса, анын 14,6 млн сому чет өлкөлүк сапарларга кеткен. Өкүлчүлүк чыгымдары 71 млн сомду, байланыш кызматтары 3 млн сомго жакын сумманы түзгөн.

Ошондой эле Жогорку Кеңеш биринчи жарым жылдыкта мүлк жана жабдууларды сатып алууга 42,7 млн сом бөлгөн. Анын ичинен компьютердик жабдууларга 22,7 млн сом, эмеректерге 19,5 млн сом сарпталган.

Мындан тышкары, резервдик фонддун чыгымдары 36,5 миллион сомду түздү.